o靚模網爆「撕」暴片 馬詩慧：道德淪亡

o靚模網爆「撕」暴片 馬詩慧：道德淪亡

o靚模搶「峰」頭，招數愈來愈激，「翻版徐子淇」Debby竟以身試法，上載自製半夜街頭被「撕」暴片段上網，惹全城圍插，媽咪級名模馬詩慧激動鬧爆：「道德淪亡！」

書展高調禁絕o靚模搞簽名會後，眾女施奇招搶人氣谷書，明抄日本妄攝概念拍寫真集的「翻版徐子淇」曾麗儀（Debby），竟以身試法，YouTube上載自己半夜街頭被陌生男子「撕」暴片段，39秒影片中，穿白色T恤的Debby深夜單獨在觀塘街頭步行，突然被迎面而來的男子扯去T恤後逃去，剩下穿Bra的她坐在地上無援地流淚。黃國桐律師表示該片涉觸犯淫褻及不雅條例，上載者隨時罰錢坐監，疑因意識不良即被網站刪除。

媽咪級前輩名模馬詩慧怒斥：「道德淪亡！呢條片意識不良，網上任睇，好易被細路有樣學樣。不但對下一代造成不良影響，呢啲女仔年紀再大仲有乜露？佢哋要反省！」名模陳嘉容亦大鬧：「好核突，引人犯罪咩？有冇諗過父母和朋友感受？」袁彌明說：「做女仔無需要做到咁？我驚佢哋嫁唔出。明明就係歪風，冇藉口撐！」才女白韻琹認為Debby為求出位不顧後果，她說：「被人撕衫鼓吹暴力，教壞細路，呢個道理好易明，唔使諗都知！」而周汶錡則謂不關自己事不作回應。

不過杜汶澤卻說：「o靚模都係一份工，事件反映到搵食艱難。我只可以講佢宣傳手法好夠創意。（過火？）呢個係供求問題，有咩觀眾就有咩Artists。觀眾近年鍾意睇咩，咩口味大家都睇到啦。公司唔登廣告，又點會有人嚟見工呢，供求問題。」

Debby死撐博宣傳
雖然遭全城圍剿，Debby經理人Sunny仍死撐影片不過火，他說：「唔過火，既然抄得日本妄攝，唔爭在抄埋日本共犯非禮條橋，當地好興好流行，明抄日本！冇簽名會嘛，各出奇謀，遲啲我哋會喺西洋菜街賣Tee，啲Tee會印咗佢哋妄攝啲相，有fans支持㗎！」而「女主角」Debby更天真地說：「我只係想宣傳，唔明點解要被刪除！網上好多影片啲女仔都係只穿胸圍底褲，我冇佢哋咁性感添！」

莊思敏斥神經病
Debby與經理人死撐犯法都只是為宣傳，辣㷫一眾前輩名模，同樣被禁的莊思敏說：「神經病！諗呢條橋嘅人好有問題，佢哋咁做即係話畀政府聽禁o靚模係正確！我出遊記都被拒搞簽名會，咁咪考慮租其他地方嚟搞。」

此外，日前Debby與「翻版李嘉欣」陳雅絲（Cat）和32C林玲（Kinki）被專賣日本內衣品牌邀請拍廣告，在店裏試內衣時玩扯bra，之後Debby賣口乖喜歡顏色鮮艷日式內衣。至於曾被傳隆胸和整容的「翻版李嘉欣」Cat專攻性感喱士Bra，雙峰堅挺視地心吸力如無物，她說：「唔解釋，總之靚就得啦！」

散播強暴影像囚3年
o靚模為宣傳寫真無所不用其極，黃國桐律師指o靚模Debby的「撕」暴宣傳片觸犯法例，他說：「散播任何強暴、令人惡心、引起社會不安的文字及影像，就係犯咗淫褻及不雅條例中的不雅條例，而佢放喺YouTube上散播而引起社會不安，就即係犯咗嗰條法例，最高刑罰係罰款50萬元及監禁3年。」